H.Upmann Magnum 46: A new FAVORITE (Aug. 13, 2021)

أول سيجار وأول كولكشن اشتريه كان في استعدادات العيد الكبير. واختياري كان لكولكشن مكون من:

H. Upmann half corona
Cohiba Exquisitos
Davidoff signature 1000
Romeo y Julieta No. 2
H. Upmann Magnum 46

مكتوبين بترتيب تدخيني ليهم، وكانو في كيس حفظ سيجار، اللي كنت أول مرة اسمع عنه. والغريب إني بدأت ونهيت بالـ H. Upmann اللي ماتبسطتش بالـ half corona وكمان خلص بسرعة. الـ Davidoff خلص بسرعة جدًا برضه، وملحقتش استمتع بيه، لكن خلاني متشوق جدًا أجرب إصدارات Davidoff وغالبًا لما ييجي وقتها، هاخد معاهم فترة. الـ Romeo y Julieta No. 2 مش محتاج كلام مني، اتبسطت بيه جدًا، يمكن أكتر من رقم 3 اللي كان أول سيجار غير رسمي يلمحلي إني ممكن ادخل عالم السيجار.

طبعًا ختامه كان مسك مع الـ H. Upmann Magnum 46.

السيجار قعد حوالي شهر في كيس الحفظ، وطالع زي الفل، وده يدل على إنه كان متخزن كويس قبل مايجيلي.

سيجار طوله 14.3 سم، والرينج 46، مقاس غير منتشر اسمه Corona gorda، ممكن نقول إنه أقرب للروبستو بس أكبر شوية، واللي شكله هخلي الروبستو يبقى من مقاساتي المفضلة.

السيجار كوبي، هاند ميد، لونج فيلر، الكاب بتاعه ٣ طبقات، والرابر لونه بني فاتح تحسه بيدي ضي نحاسي.

لحد كده والكلام مبشر، ويلا نقطع الكاب، اللي قطعته قطع عادي. اللي غير مبشر إن ذاكرة لساني التذوقية نوعًا ما أبيض ياورد.

الكولد درو بدأها بزغزغة توابل مع شوية مزازة خفيفة مسكرة، وطعم تالت مبقتش عارف ده جلد ولا خشب، بس هنمشيها جلد.

ولعنا، وهوب السحب طيارة، الدرو مش بس سالك، لا، ده مفتوح على البحري. والاحتراق سريع.

التلت الأول طعم التوابل ظاهر وصريح، والمزازة اللذيذة ظاهرة، مع طعم الجلد. الريتروهيلنج سلس جدًا، وفي زغزغة خفيفة من طعم التوابل. الاحتراق متوازن، والآش متماسك جدًا.

التلت التاني كل ده بيختفي، وأهلًا بالمكسرات المملحة. ميكس كاچو على فزدق، كان لايق جدًا مع شويبس الليمون اللي باشربه. النيكوتين لحد دلوقتي خفيف، والآش كان لازم يقع عشان بدأت اتحرك كتير عشان أصور وأوثق العظمة اللي بيعملها السيجار ده.

التلت الأخير بقى، المكسرات اختفت تمامًا، الطعم الجلدي هو المسيطر، مع توابل خفيفة بيزيد أثرها في الريتروهيلنج؛ وهجمة نيكوتين عنيفة في كام خبطة خلتني ادخل في نيكوتين راش أول ما خلصته.

مدة التدخين حوالي ٥٠ دقيقة.

الدخان كثيف، والاروما مش أحلى حاجة.

طلعت من القاعدة دي بأول سيجار يدخل قايمة مفضلاتي رسيمًا.