Davidoff Nicaragua Robusto Tube (Dec. 24, 2021)

-


Wrapper: Nicaraguan Habano Rosado
Binder: Jalapa
Filler: Esteli, Condega, and Ometepe
Size: 5" x 50 Robusto
سيجار داڨيدوف نيكاراجوا من أشهر اصدارات داڨيدوف المعروفة بإيحاءتها القوية. السيجار أول ما تشوفه بلونه البني الغامق اللامع بضي برتقالي، قاسي، العروق واضحة بطوله، والاتنين "باند" بتصميم داڨيدوف البسيط؛ هيديك إيحاء إنك داخل تجربة مركبة، مش مجرد سيجار "تقيل" بقوة إيحاءاته وجرعة النيكوتين فيه.
السيجار عندي من حوالي ٤ أشهر، وده كان أول سيجار اشتريه عشان مناسبة، مش لمجرد الاستكشاف وتدخين "بليند" جديد. وطول مدة تخزينه ساعدت إنه يرتاح بشكل كاف، وإنه يطلع ما عنده بالكامل.
مدة تدخينه قربت للساعة وربع، ودي مدة طويلة على مقاس "روبستو"، بس من كتر استمتاعي بيه كنت بدخن على مهل، وانطفأ مني أكتر من مرة في التلت الأخير من كتر ما كنت باسرح معاه.

السيجار في ثلثه الأول بروفايله كان واضح تمامًا... طعم خشبي، مع فلفل أسود على الشفايف، مع لسعة زنجبيل، اللي بتوصل لطرف اللسان. في آخر اللسان بتحس بطعم مكسرات أقرب للجوز، والـ"ريتروهيلينج" سلس، مفيش فلفل أسود كتير. وفضلنا على الحال ده شوية مع ظهور خفيف لشوكولاتة غامقة بسكرها الخفيف في آخر اللسان مع المكسرات. الدخان متوسط لكثيف، والأروما لطيفة جدًا.
الثلث التاني بدأ والتوابل بدأت تزيد، خصوصًا في الـ"ريتروهيلينج" مع الفلفل الأسود، والطعم الخشبي مكمل، بس بتغيير خفيف، مقدرتش أميز تفاصيله أو ألاقي له شبيه!
في الثلث الأخير السيجار بيكشف عن وجه عنيف متخفي من البداية؛ الفلفل الأسود بيثبت وجوده بقوة لدرجة إني عطست، والنيكوتين اللي كان متواجد بشكل متوسط من البداية بيزيد من قوته، لكن بدون عنف او خبطات مفاجأة. والطعم الخشبي بقى أقرب لريحة "راكية" صافية في ليلة شتوية زي ليلتنا دي.
السيجار كان اختيار شبه عشوائي لغرض احتفالي، ولم يخذلني.



Comments

Post a Comment

Popular posts from this blog

José Bartolo Robusto (Nov. 12, 2021)

-
Image
  سيجار سهرة الليلة كان خوسيه بارتولو روبستو. بقاله شهر ونص بيرتاح ويا البوڨيدا وياخد وضعه كده. Online Photo السيجار في التلت الاولاني بدأ بعوكوسات. الاحتراق مش مظبوط، وجنب أعلى من جنب بسبب tunneling اتسبب إن الاشتعال يبقى طيارة في جنب منهم، وكل شوية ألاحق ع التاني بالولاعة. طبعًا ده حول القاعدة لمدخنة عربية بطاطا، مش أكتر. التلت التاني فضلنا ع الحال ده شوية، وفي نصه سرعة الاشتعال هديت، وخط الاشتعال بقى مسطرة، والبارتولو قلب مستورد! إيحاءات مكسرات مملحة، مش شوية فلفل أسود بيزغزغ في اللسان والريتروهيلينج، مع افترتيست كريمي. حاجة ولا شغل الخواجة في كوبا! التلت الأخير كمل على نفس الحال، وكنت مستني المزازة إياها تظهر، أو مرارة الجلد تبان... مفيش. الفلفل هو اللي قل شوية، والمكسرات والأفترتيست الكريمي مكملين. ويمكن اللي عزز إيحائاته إني كنت واكل قبله طبق حلو، فيه صوص كراميل، ومشربتش حاجة أثناء التدخين. الروبستو لحد دلوقتي مقصرش معايا غير مرة واحدة من ٤ أو ٥ مرات من نفس العلبة. وكل ما يطول في التابروير، كل ما يظبط أكتر، كأنه لونج فيلر sungrown ابن اللذينه.
Read more

Plasencia Alma Fuerte Generacion V Salomon

-
Image
السيجار الأخير. درة ثلاثي عيد الميلاد. من البداية كان اختياري الأول كسيجار سهرة عيد ميلادي، بسبب شكله العجيب اللي يحسسك إنه صاروخ هربان صندوق ألعاب نارية، وباند بتصميم وألوان ملكية. الهيئة غير المعتادة باسم Salomon أو Big Figurado بتتميز بأن الرأس بتكون صغيرة، وبيزيد قطر السيجار نزولًا للقدم، اللي بتنتهي منتفخة، وخارج منه بوز صغير!  Vitola: Salomon (Box Presed)  Length: 178 mm Ring Gauge: 58 Strength: Medium - Full Wrapper: Nicaraguan Habano Binder / Filler: Nicaragua / Nicaragua Wrapper Color: Colorado Maduro الغلاف زيتي الملمس - العروق كتير وواضحة الإيحاءات الباردة: الجسم: توابل ضعيفة - سيدر ضعيف. فوت: ضيق ومش باين منه حاجة. كولد درو: شوكولاتة غامقة ونعناع قوي جدًا. الثلث الأول: أول نفس أرضي صرف بدون أي تدخلات تانية. بعدها بيبدأ السيدر والنعناع في الظهور، وتحس ببرودة في الدخان بسبب النعناع. الدرو سالك جدًا، فيراري. فلفل ابيض خفيف أوي في زوري، وفلفل أسود في الريتروهيلنج خفيف جدًا. الطرف الضيق كان بداية مخادعة، الإيحاءات فيه اختفت، والدرو اتغير مسك نفسه شوية بعد ما كان مف...
Read more

H.Upmann Magnum 46: A new FAVORITE (Aug. 13, 2021)

-
Image
أول سيجار وأول كولكشن اشتريه كان في استعدادات العيد الكبير. واختياري كان لكولكشن مكون من: H. Upmann half corona Cohiba Exquisitos Davidoff signature 1000 Romeo y Julieta No. 2 H. Upmann Magnum 46 مكتوبين بترتيب تدخيني ليهم، وكانو في كيس حفظ سيجار، اللي كنت أول مرة اسمع عنه. والغريب إني بدأت ونهيت بالـ H. Upmann اللي ماتبسطتش بالـ half corona وكمان خلص بسرعة. الـ Davidoff خلص بسرعة جدًا برضه، وملحقتش استمتع بيه، لكن خلاني متشوق جدًا أجرب إصدارات Davidoff وغالبًا لما ييجي وقتها، هاخد معاهم فترة. الـ Romeo y Julieta No. 2 مش محتاج كلام مني، اتبسطت بيه جدًا، يمكن أكتر من رقم 3 اللي كان أول سيجار غير رسمي يلمحلي إني ممكن ادخل عالم السيجار. طبعًا ختامه كان مسك مع الـ  H. Upmann Magnum 46. السيجار قعد حوالي شهر في كيس الحفظ، وطالع زي الفل، وده يدل على إنه كان متخزن كويس قبل مايجيلي. سيجار طوله 14.3 سم، والرينج 46، مقاس غير منتشر اسمه Corona gorda، ممكن نقول إنه أقرب للروبستو بس أكبر شوية، واللي شكله هخلي الروبستو يبقى من مقاساتي المفضلة. السيجار كوبي، هاند ميد، لونج فيلر، الكاب بتاعه ٣ طب...
Read more