H Upmann Half Corona (Dec. 13, 2021)

واحد من أوائل السيجار اللي جربتها، وكانت تجربتي معاه غاية في السوء، وكنت مقرر مدخنوش تاني. المرة ده حصل غلط في أوردر، وجالي بالغلط. قلت دي علامة عشان ياخد فرصة تانية، خصوصًا بعد ما الواحد بدأ يفهم في أصول تخزين السيجار، وإن السيجار اللي شاريه جديد لازم أسيب يرتاح مع بوڨيدا أسبوعين على الأقل -أنا بأفضل شهر- عشان أقدر استمتع بيه وبإيحاءاته.

مؤخرًا كنت بجرب حاجة جديدة؛ طلعت كل السيجار اللي هدخنه الأسبوع ده، وحطيته في "دراي بوكس" مع بوڨيدا ٨جم، وقفلت عليهم كيس "زيب لوك"؛ عشان اعمل تهدئة للسيجار من رطوبة الجو، عشان ميحصلوش صدمة، وفرق الرطوبة يكون بخار مياه داخل السيجار، فيتنفخ وسط التدخين، والغلاف يتشقق!

والتجربة نجحت في أول اختبار.

السيجار مقاسه ٩٠مم والرينج ٤٤.

الغلاف والحزام والحشو كلهم كوبي. اللف يدوي، بحشوة طويلة "long filler"، وغطاء رأس "cap" ثلاثي.

اصدار "هاف كورونا" من إتش آبمان بدأ إنتاجه في ٢٠١١، في صندوق من ٢٥ سيجار، وكان بهدف إنتاج سيجار عالي الجودة، مناسب لمدة تدخين قصيرة، ٢٠ - ٢٥ دقيقة؛ إلا أن مدة تدخيني وصلت لـ ٥٠ دقيقة!

السنة دي تم انتاج اصدار جديد منه، علبة معدن فيها ٥ قطع، تم الإعلان عنه على موقع habanos.com في يوليو الماضي. الاصدار ده مشجع جدًا لاقتناء عدد القطع القليل، وكمان لأن سعر السيجار القليل مع جودته العالية حجزوله مكان معتبر ضمن قائمة السيجار الاقتصادي. وإن كان بعد ما بدأ ياخد شهرة في السوق المصري، سعره ارتفع بما لا يتناسب مع قيمته السعرية، والنقطة دي محتاجة مراجعة من التجار، لأنها هتفرق في حجم مبيعاته.

نكمل بقى مراجعة السيجار، اللي صغر حجمه هايخلينا نقسمه نصفين، مش تقسيمة الثلث المعتادة.

القطع كان Punchcut. الكولد درو فيه طعم مسكر مع طعم خشبي، في ميكس مشوق بارد. بعد ما حمصنا وولعنا؛ أول نفس خشب مع توابل خفيفة وتسكيرة لطيفة. خلال النصف الأول التوابل بتتحرك معانا برشاقة، مع طعم مسكر لطيف، والنيكوتين هادي وخفيف.

في النصف التاني، البرفايل بيتغير تمامًا، وأكتر من مرة كمان بطريقة غير متوقعة من سيجار بالحجم ده، الفلفل الاسود بيظهر، وبيزغزغ في الريتروهيلنج. بتعدي علينا إيحاءات من خفيفة من الشوكولاتة والتوابل. لكن، في الآخر كل ده بيختفي، وتحس فجأة كأن اتعصر قصاد وشك قشرة برتقانة صيفي طازة مززة ومسكرة، مع طعم أرضي منعش. نفسين بالظبط والبرتقان بيختفي، ويفضل طعم الأرضي. النيكوتين خفيف لمتوسط.

السيجار بعد ما كرهته أول مرة، وقعت في غرامه، واتصالحنا تمامًا المرة دي. ويمكن تكون دي بداية جديدة لعلاقتي بالسيجار الاقتصادي!