Punch Signature Robusto
Wrapper: Ecuadorian Corojo
Binder: Connecticut Habano
Filler: Dominican Republic, Nicaragua
Size: 5 Inches
Ring Gauge: 54
Vitola: Robusto
سيجار النهاردة تحديدًا كان ترشيح مباشر من التاجر/الصديق -اللي مكانش صديق يومها وكنت أول مرة اشتري منه- لما عرف إني بأفضل السيجار التقيل. ورغم ثقتي في ترشيحاته اللي زادت مع الوقت ومعرفتي بيه أكتر بشكل شخصي، إلا إني كنت كل مرة أفتح العلبة عشان اختار سيجار، أبص على الـ Punch وأقول شكله مش تقيل كفاية، خليه لقاعدة خفيفة. لحد ما جه وقته ونصيبه، وطلع من العلبة.
أول مفاجأة كانت في الـ"cold draw" طعم خشبي وسيدار وفلفل أحمر على طرف شفايفي، وطعم مسكر قوي عارفة كويس بس مش قادر أجمعه. الطعم ده جايلي من زمان، بذكريات كتير، عارفة وبحبه ومش قادر أجمعه خالص. سحبت مرتين كمان على البارد، وافتكرته. افتكرت أبويا اللي أول حاجة قالها (الصعايدة وصلوا) لما شافنا على سلم العمارة أنا وأختي واحنا نازلين نقابله وهو راجع من أسوان في سفرية شغل راحها لمدة أسبوع. كان شايل شنطة خوص كبيرة -كنا مسمينها الـ"قفة"- بلونها الفاتح بلون الخوص، وفيها كام خط بالعرض لازقين في بعض ملونين كحلي وأحمر وأخضر، متخيطة ومقفولة بدوبار غامق عشان اللي فيها مايقعش. ومن ضمن اللي فيها أقماع السكر البني اللي طعمها شبه العسل الاسود، بس سكرها هادي شوية، واسمها "جلَّاب". دي كانت أول مفاجأة من سيجار جاي من هندوراس، بيرجعني تقريبًا ٢٥ سنة لورا، على بسطة الدور الرابع في عمارتنا القديمة، مع "قفة" خوص جايبها أبويا من الصعيد، وطعم الجلاب طالع بقوة من السيجار اللي لسه مولعتوش.
بأولع وببدأ الثلث الأول بتاني مفاجأة، خبطتين نيكوتين في أول سحبتين، مع فلفل أحمر لسع طرف لساني بيقولي بيهم السيجار "أنا مش هادي ولا خفيف". وبيهدأ بعدهم هدوء نسبي، بس أنا اللي ماهديتش وفضلت بدخن بحذر. الفلفل الأحمر مكمل، بيسيب طرف لساني، وبيستقر في آخره، مع زغزغة مستمرة في شفايفي. النيكوتين فضل متوسط، مع طعم خشبي وأرضي موجودين بثبات على خلفية الفلفل الأحمر. خط الاحتراق متساو، الرماد صلب ومغري بالمحافظة عليه لأطول مدة ممكنة، ومعدل الاحتراق بطئ جدًا، بيديك فرصة كاملة للاستمتاع بكل تفصيلة ممكنة في قاعدتنا مع السيجار.
في الثلث الثاني الطعم الخشبي والأرضي بيضعفوا أوي، والفلفل الأحمر بيتحول لفلفل أسود، بيغزو الـ"ريتروهيلينج" ومعاه ريحة تحميص بن حلوة ومنعشة جدًا. النيكوتين فضل متوسط لقوي. الإحتراق مازل بطئ، وده زود متعة السيجار.
الثلث الأخير البن بينسحب، والفلفل الأسود بيكمل، بس بهدوء أكتر من قبل كده، مع إيحاءات الخشب والجلد والأرض - المزيج الكوبي الخشن للسيجار- بيظهروا في ختام الجلسة المطولة مع سيجار هندوراسي المنشأ، ذو أصول كوبية تعود لمنتصف القرن الـ ١٩، هجربها يومًا ما. قوة النيكوتين فضلت متأرجحة بين المتوسطة والقوية. خط الاحتراق كان متموج شوية، ورجع اتظبط تاني.
مدة التدخين الكلية ساعة وخمسين دقيقة. ودي مدة طويلة جدًا على مقاس الـ"روبستو"، ساعد فيها بطئ الاحتراق، وبطئي في التدخين، لاستمتاعي الزايد بسيجار كان مفاجأة غير متوقعة.
Comments
Post a Comment