Romeo y Julieta Short Churchill (Dec. 24, 2021)

Wrapper Color: Colorado
Wrapper: Cuba
Binder: Cuba
Filler: Cuba
Size: 123 mm
Ring Gauge: 50
Vitola: Robusto
Smoking time: 95 min
Paired Drinks: Coffee, coffe latte & red tea

سيجار النهاردة كوبي (روميو وجولييت تشرشل قصير)، نقدر نقول عليه بلغة السيارات "مقاس معدل" من اصدار روميو وجولييت الأشهر (روميو وجولييت تشرشل). الاصدار حديث نسبيًا، بدأ إنتاجه في ٢٠٠٦، ويعتبر من أشهر إصداراتها الروبستو.

لو تأملنا شكل السيجار الخارجي، هنلاقيه بيعلن عن شخصية قوية أنيقة محملة بطبقات من تاريخ صاحب اسم الاصدار الأشهر (سير وينستون تشيرشل). فالغلاف فاتح "كولورادو"، "توثي toothy"، بعروق قليلة، وغطاء رأس ثلاثي، مع ٢ باند؛ باند روميو وجولييت الأشهر، والثاني ذهبي عليه اسم الاصدار بلون أسود وخط عريض.

بعد القطع، والتذوق البارد، بنلاقي إيحاء مسكر لطيف مع أرضي شبيه بريحة تربة جنينة عاوزة تتروي.

الثلث الأول هادي، مفيش توابل ولا فلفل أسود زي ما كنت متوقع، بالعكس، الطعم المسكر اللي حسيته قبل الإشعال، اتحول لكراميل لطيف، مع تحميص يخليك متلخبط؛ ده تحميص مكسرات، ولا تحميص قهوة بتظهر خفيف! بعد شرية الكراميل بيتحول لشوكولاتة فاتحة، مع زغزغة توابل حريفة خفيفة أوي في آخر اللسان!

في الثلث الثاني الشوكولاتة طعمها بيبقى أقوى شوية، وأغمق بمرارة الشوكولاتة الجميلة، مع طعم كريمي، ومكسرات محمصة، ومسحة قهوة خفيفة. والفلفل الأسود بيبدأ يظهر بهدوء. خط الاحتراق فضل مظبوط من البداية، لحد قرب نهاية الثلث الثاني. لكن بدأ جنب يتحرق أسرع من التاني، بسبب اختلال في نسبة الرطوبة، وده لأني أختارت السيجار للتدخين في حينه، وملحقتش اريحة شوية في صندوق التجفيف.

اختلال خط الاحتراق مطولش كتير، واتعدل في الثلث الأخير، وإن كان بقى متموج شوية. إيحاء الشوكولاتة الغامقة فضل مكمل، والفلفل الأسود بيزيد، مع طعم خشب سيدار لطيف. والمضحك في خشب السيدار إني كنت بقراه دايمًا في المراجعات الأجنبية، بس معرفوش ومعنديش له أي ذاكرة تذوقية. معرفش إيه اللي خلاني المرة دي اشم صندوق التجفيف اللي عندي بما إنه خشب سيدار! وأول ما ظهر معايا في الثلث الأخير وعرفته، كنت عاوز أقوم اعمل طيارة أبو تريكة.

النيكوتين ضعيف لمتوسط، ومتطمعش في أكتر من كده.

السيجار بوجه عام ممتع جدًا، بهدوء ورزانة. عامل زي أخوك الكبير الرزين اللي في آخر أربعينياته، بس وهو صغير كان هلاس وخاربها، فاتتفاجئ بقفشات غير متوقعة منه.