Toscano Garibaldi (Dec. 23, 2021)

Wrapper: Italian Kentucky Seed Fire Cured
Binder: None
Filler: USA Kentucky, Italian
Length: 152 mm
Ring Gauge: 38

دي أول تجربة للتوسكانو، وكنت مأجله لقاعدة حلوة وأكلة تقيلة.

السيجار زي ما احنا شايفين مختلف عن الشكل المعتاد للسيجار، ومختلف كمان في طريقة معالجة أوراق التبغ، واللف. وبدون ما ندخل في تفاصيل كتير، التوسكانو بيعتمد في انتاجه على التخمير والانضاج الحراري للتبغ، والمنتج النهائي بيكون أكثر جفافًا من السيجار المعتاد، وتخزينه مش بيحتاج ظروف خاصة تعتمد على ثبات درجات الحرارة والرطوبة، بالعكس، مجرد بس إنك تشيله في مكان مابيشوفش الشمس وخلاص. حتى النسخة المصري منه بنتعمد نعاملها بقسوة، وحرفيًا بنرميها في أي درج.

لو هانستعرض السيجار ظاهريًا هنلاقي ورقة الغلاف جافة نسبيًا. الطرفين مقطوعين، ممكن تولع من اي طرف منهم. بالإضافة للشكل العام، سميك من المنتصف، رفيع من الأطراف.

وبما إني بحب أذاكر أي سيجار قبل ما اشتريه، وأراجع اللي ذاكرته قبل ما ادخنه، فكنت متوقع إني داخل على تجربة مش سهلة، السيجار بحسب المراجعات اللي قريتها، قوي، نيكوتين تقيل؛ ويمكن للسبب ده الطلاينة بيحبو يقسموه نصفين، نص يدخنوه بعد الغدا، ونص بعد العشا. وبما إني كنت مدخل الغدا في العشا، فكنت مقرر إنه يبقى سيجار السهرة. وشربت معاه قهوة فرنساوي، اللي مظبطتش معاه أوي لأن البن كان فاتح، وده مش مزاجي.

نيجي بقى للسيجار نفسه وإيحاءاته؛ مخيب للآمال تمامًا. مفيش إيحاءات كتير، على طول الخط طعم كريمي مسكر خفيف، مع عرق سوس، وليمونادة خفيفة أوي... والنيكوتين تقريبًا كان واخد اليوم إجازة عارضة، ومحدش شاف وشه. فين قرب الآخر، لما السيجار انكتم وحاولت اسلكه بالـ"نابر"، ظهر شوية مكسرات على خفيف، وريحة خَبيز طازة بطعمها الحلو؛ بس كان خلاص بيقول وداع.

التجربة بوجه عام مكانتش مرضية خالص، لدرجة إني ولعت وراه على طول فخر انتاجنا المحلي "بارونيت"، وطلبت معاه سحلب، وكان إحساسي زي اللي كان محشور في حفلة لـ (ويجز)، وخرج منها يغسل ودانه بـ "هو صحيح الهوى غلاب"... معرفش أنا!