AVO Syncro Nicaragua Robusto

(آڨو) من الماركات اللي كنت متشوق أربها، وأكتر من مرة تيجي عند التجار وتخلص قبل ما آخد قرار الشرا من كتر ما كنت متردد اشتريها بسبب الشكر المبالغ فيه كل اللي جربوها. وأنا أي حاجة بلاقي عليها إجماع و"أفعل" التفضيل بتستخدم كتير لوصفها، باخد منها جنب. ده غير سعرها اللي كنت شايفه مبالغ فيه. وكنت عاوز اشتريها لأني معجب بالـ"تيوب" وعاوز احتفظ بيها، فاتغاظت من نفسي وتعمدت أسوف في قرار الشرا كتير، والتاجر اللي كان جايبهم خلص الاستوك اللي عنده. لحد ما وقع في سكتي "سامبلر" محترم بسعر محترم جدًا، كان مغري إني آخد قرار الشرا بسرعة على غير المعتاد. وبعد ٣ شهور ونص تقريبًا كان معادي مع أول تجربة من (آڨو). 

Wrapper: Ecuadorian Connecticut

Wrapper Color: Colorado Claro 

Binder: Dominican

Filler: Nicaraguan (Ometepe) | Dominican (Piloto Cubano, San Vicente, & hybrid Olor/Piloto) | Peruvian (Olancho)

Factory: Oettinger Kelner Cigars (Dominican Republic)

Vitola: 5″ x 50 robusto

أروما الجسد: جلد طبيعي مدبوغ طازة (جلد جديد) 

أروما الفوت: جلد وشوكولاتة وتوابل حريفة

السحب البارد: شوكولاتة غامقة تقيلة وتوابل حريفة لسعت شفايفي من الرابر والسحب مفتوح على البحري

أول ثلث:

أول نفس كريمي مع توابل ومكسرات محمصة ولسعة فلفل أحمر "شطة" في زوري، وفلفل أسود في الريتروهيلنج.

البروفايل من البداية حامي وحريف، فلفل أحمر هياكل شفايفك وسقف حلقك وآخر لسانك وزورك. شوية واللسعة هاتقف عن سقف الحلق، والفلفل الأبيض هايهدي الحريقة شوية في الزور واللسان. افترتيست مكسرات محمصة لطيف مع الفلفل الأبيض. الشوكولاتة الغامقة والجلد المر مع المزازة بيظهروا شوية شوية.

النيكوتين من الأول كده وسط لقوي؛ كانت وحشتني كبسته على دماغي.

خط الاحتراق متموج

الثلث الأول في ٢٤ دقيقة

الثلث الثاني:

كل ما هو حريف اختفى، ما عدا الفلفل الأبيض في آخر الحلق، والفلفل الأسود في الريتروهيلينج. المكسرات المملحة هي الإيحاء الأساسي دلوقتي، مع لمحات من السيدار، مزازة قشر البرتقال في الريتروهيلنج مع الفلفل الأسود.

وصلنا لمنتصف الثلث الهادي في كل حاجة، إيحاءات رزينة، ريتروهيلينج الفلفل فيه هادي جدًا، لكنه بيحمى مرتين جامد، ويرجع للهدوء تاني. النيكوتين ضعف ويكاد يكون وسط.

نهاية الثلث الثاني بيظهر فيها الجلد بمرارة لطيفة، مع مزازة قشر البرتقال في الأفترتيست وفي الريتروهيلنج مع الفلفل الأسود. والنيكوتين زي ما هو، أقل من الوسط.

نهاية الثلث الثاني بعد ٣٨ دقيقة.

الثلث الأخير:

بيبدأ بنفس البروفايل اللي ختمنا بيه الثلث التاني، وبيزيد عليه قرنفل عشان يقوم بدور الربط بين الإيحاءات ويحسن من الإحساس بيها وتذوقها. النيكوتين بتزيد قوته بوتيرة متسارعة، عشان يعمل غمامة جوا دماغي. الجلد المدبوغ الفريش بيظهر بقوة، وبيسيب أفترتيست جميل.

الجلد بيسيطر ومرارته بتزيد، ومزازة قشر البرتقال بتتركز أكتر، وبتتحول لجوزة الطيب، بتطلع من الحلق للمناخير.

النيكوتين بدأ يبقى قوي، وبيحاول يجيب نيكوتين راش.

نهاية الثلث الأخير بمدة... (تقريبًا من كبسة النيكوتين سرحت ونسيت أبص في الساعة).

التجربة بوجه عام ممتعة جدًا، وأول سيجار من (آڨو) مخيبش ظني، بالعكس، ده فاق توقعاتي واحتمال يدخل قايمة المفضلات مع (أوليڨا)، لو باقي السامبلر عجبني بنفس الطريقة.