La Aroma De Cuba Mi Amor Robusto box pressed
"لا أروما دي كوبا" واحدة من أقدم شركات التبغ الكوبية، اللي بيرجع تاريخها لسنة ١٨٨٠. وكانت من أوائل الماركات اللي وقع في غرامها الملازم الشاب وينستون تشرشل لما كان في كوبا سنة ١٨٩٥ لرصد الثورة الكوبية وحربها ضد الاستعمار الإسباني. هناك وينستون وقع في غرام التبغ الكوبي الملفوف يدويًا. وواضح من مذكراته إن الفترة اللي قضاها في كوبا كانت من الفترات الجميلة في حياته، حتى إنه وصف كوبا بـ "الكبيرة، الغنية، والجزيرة الجميلة".
وبعد أكثر من ١٢٠ سنة، في بداية الألفينات، "لا أروما دي كوبا" بتبدأ في صناعة ميراث جديد ومتميز في نيكاراجوا تحت إشراف أسطورة صناعة السيجار الحالي خوزيه بيبن جارسيا.
السيجار هيئته العامة مع الباند اللاتيني الرومانتيكي وصورة السيدة الممتلئة الناعمة، يوحي بتجربة مرهفة، شبه قطعة موسيقى چاز بطلها الساكسفون. إلا إن السيجار من بدايته بيعلن عن رفضه للحكم المسبق بإيقاعات خشنة كأنها أغنية ميتال.
الجسد: توابل - شوكولاتة
فوت: شوكولاتة غامقة
كولد درو: فلفل أسود - شوكولاتة - حبهان
أول نفس: فلفل أسود - شوكولاتة غامقة جدًا - جلدي - توابل طعمها غريب معرفتش أميزها - مرارة في آخر الزور.
البروفايل من البداية كوبي خشن مفيش لمحة هزار. الشوكولاتة مش غامقة بس، لا، ده كاكاو خام. الطعم الجلدي مع الكاكاو إيحاؤه مختلف تمامًا عن ما اتعودت عليه مع مزازة الحمضيات، تحس شخصيته بقت أقوى، مش مهزوز وبيعوض ده بإنه يتساخف عليك ويمرر حلقك. الفلفل الأسود في الريتروهيلنج لطيف، متوسط، ومعاه توابل خفيفة.
بدأ بهجمة فلفل أسود وأبيض ولسوعة من أول شفايفي لحد آخر زوري. الطعم الجلدي والكاكاو بينسحبو بهدوء. الريتروهيلينج فيه فلفل أسود بسيط. شوية وبدأ يبقى في أفترتيست مكسرات.
خط الاحتراق منتظم.
نفس البروفايل الجلدي مكمل معانا. المكسرات زادت مكان الكاكاو. هنت بسيط فاكهة مجففة، وأفترتيست كاكاو، مع فلفل أبيض في آخر اللسان والزور. المكسرات بتزيد ودخل معاها توابل أقواها جوزة الطيب علي لساني وفي الريتروهيلنج. وفي افترتيست شبه الزعتر!
الثلث بيختم بتحميص بن قوي، كأني دخلت بمناخيري جوا مدخنة المحمصة.
النيكوتين ضعيف في الثلث الأول والثاني، وبيبقى متوسط في الثلث الأخير.
التجربة بشكل عام مرضية جدًا، وكانت بداية تعارف جميل مع عطر كوبا "حبي".
Comments
Post a Comment